MINGGU TRINITAS 7 JUNI 2020

IBADAH MINGGU TRINITAS

HURIA KRISTEN BATAK PROTESTAN

DISTRIK XVII INDONESIA BAGIAN TIMUR

 

HASITOLUSADAON NI DEBATA

EV : 1 MUSA 1 : 26 – 31 EP : JOHANNES 1 : 29 – 34

TOPIK /TEMA :

“ HAMULIAON NI JAHOWA DI ANGKA NA TINOMPANA ”

“ KEMULIAAN ALLAH ATAS CIPTAANNYA ”

Minggu, 07 Juni 2020

01. Joujou tu Parsombaon
L: Huria ni Tuhanta, angka dakdanak Sikola Minggu, Remaja, Naposobulung, ama, Ina, Lansia, saluhutna hita angka na nihaholongan ni Tuhan Debata. Minggu sadarion, masuhanta ma minggu Trinitatis, Hasitolusadaon ni Debata, i ma Debata Ama, AnakNa Tuhan Jesus Kristus dohot Parsaoran ni Tondi Parbadia.
R: Tapuji jala taendehon ma hasangaponNa i. Ibana naung manghaholongi hita sian mulana jala sahat ro di saleleng ni lelengna.
L: Taparade ma rohanta mamuji denggan basaNa i, tapangiar ma soaranta mangendehon hamuliaonNa i.
Marende BE No. 648: 1 – 2 “Sangap di Debata Ama”
♫ Sangap di Debata Ama, sangap di AnakNa i
Nang di Tondi Porbadia Debata na songkal i
Haleluya puji Tuhan salelenglelengna i
(Jongjong)
♫♫ Puji Raja siparholong Sipalua jolma i
Na patauhon hita bongot tu harajaonNa i
Haleluya puji Tuhan Raja na tarsilang i


02. Votum – Introitus – Tangiang
L: Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Huida Tuhan i hundul di atas habangsa na timbo jala na marmulia, jala angka rambu ni paheanNa manggohi bagas joro. Jongjong di atas surusuruan Seraphim, jala masijouan ma nasida songon on: Na badia, na badia, na badia do Jahowa Sebaot, gok hamuliaonNa liat portibi on.
R: Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus. Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanNa i, di bagasan holong ni roha.
L: Ida ma sai nolnol do mata ni Jahowa tu angka na manghabiari Ibana, angka na manghalungunhon asi ni rohaNa. Sai dihalungunhon rohanami do Jahowa. Ibana do panumpahi dohot lombulombunami. Ai mangasahon Ibana marlas ni roha do hami, marhaposan tu GoarNa na badia i do hami. Sai pasonggop ma asi ni rohaM tu hami, ale Jahowa, hombar tu panghalungunhonnami di Ho. Haleluya!
J: (Mangendehon): Haleluya…Haleluya…Haleluya
L: Martangiang ma hita: Ale Debata Sitolu sada, Debata Ama, Anak dohot Tondi Parbadia! Na mandok mauliate ma hami tu Ho, ala ditompa, dipalua jala diparbadiai Ho hami hinorhon ni asi dohot holong ni rohaM na godang i. Sai ramoti ma hami di bagasan parmaraan dohot pangunjunan, apuli hami uju marsak, pahehe hami uju tinggang jala togutogu hami di hasusuda ni bohaluami tu harajaonMu na di banua ginjang i, asa disi pujionnami Ho marhitehite roha dohot hata na imbaru. Amen. (Hundul)

03. Marende BE . No. 123:1 “Ale dongan na saroha”
♫ Ale dongan na saroha manjalahi dame i
Dompak Jesus tapasada holong ni rohanta i
Ai Ibana do ulunta hita do ruasNa i
Tuhan Jesus do gurunta hita siseanNa i

04. Patik
L: Tangihon hamu ma patik ni Debata di minggu sadari on, ima patik VII dohot VIII
Patik Papituhon: Unang ho mangalangkup!
Patik Paualuhon: Unang ho manangko!
Antong, rap mangido gogo ma hita tu adopan ni Debata laho mangulahon na hombar tu patikNa i
L+R: Ale Tuhan Debata! Sai pargogoi ma hami mangulahon na hombar tu PatikMi. Amen
05. Marende BE No. 174: 1 “Torop dope Nasiat i”
♫ Torop dope na siat i Di hasampuran rea
I pe hamu pardosa i Sai olo ma porsea
Ai Debata manjou hamu Tu hasonangan situtu
Hamu, hamu Dijou Debatamu (Jongjong)

06. Manopoti Dosa – Bagabaga Hasesaan ni Dosa
L: Tatopoti ma dosanta na godang I tu adopan ni Debata, martangiang ma hita: Ale Debatanami, na marasiroha jala na badia, Amanami, marhitehite Tuhan Jesus Kristus! Manang piga hali hami ro tu joloM, huhilala hami, ringkot do asi ni rohaM di saluhut hami halak pardosa. Ala ni i do umbahen na hupaserep hami dirinami sadari on di joloM, jala huparhatopot hami, tung na jotjot do hami manimbil sian angka dalanMu na badia songon birubiru na lilu. Sai unang pabali hami sian joloM ala ni dosanami i, ai ndang dihalomohon rohaM hamatean ni angka pardosa, alai hamubaon ni rohana do lomo ni rohaM, asa mangolu. Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di GoarMu na badia i. Amen.
L: Bagabaga ni Debata taringot tu hasesaan ni dosa : Molo tung adong manang ise na mardosa, adong do pangondianta di Ama i, i ma Tuhan Jesus Kristus na tigor roha i. Jala Ibana do pardengganan taringot tu dosanta, alai ndada holan taringot tu dosanta, dohot do taringot tu dosa ni saluhut portibi on.
Hasangapon ma di Debata na di ginjang !
L /R : Amin.

07. Marende BE No.112:1 “Haleluya Tapuji ma”
♫ Haleluya tapuji ma Amanta Tuhan Debata dibaen denggan basaNa
Sai tong girgir ma hita be pasangap Debatanta i dibaen asi rohaNa
Sangap, sangap, hagogoon, hatoguon, hapistaran di Amanta na di Ginjang

08. Epistel : Johannes 1: 29 - 34
L: Tatangihon ma hata ni Debata na gabe Epistel di Minggu Trinitas sadari on na tarsurat di buku Johannes 1: 29 – 34 songonon ma didok disi: Torang ni arina i diida si Johannes ma Jesus ro tusi, jadi didok ma: On do Birubiru ni Debata, na mamorsan dosa ni portibi on!
R: Ibana do na hudok i: Sian pudingku ro sada halak, naung jumolo adong asa ahu; ai parjolo hian do Ibana.
L: Ahu pe, ndang hutanda Ibana; alai asa tandap Ibana di halak Israel, umbahen na ro ahu mandidihon aek.
R: Dung i dihatindangkon si Johannes ma, ninna ma: Huida do Tondi i tuat songon darapati sian banua ginjang i jala mian di Ibana!
L: Ahu pe, ndang hutanda Ibana jolo. Alai Ibana na marsuru ahu mandidihon aek, I do mandok tu ahu: Ia tusi diida ho tuat Tondi i jala mian di Ibana, Ibana do sididihon Tondi Parbadia.
R: Asa nunga huida jala huhajongjongkon: Ibana do Anak ni Debata
L: Ima sahatna. Martua do angka na tumangihon Hata ni Debata jala na umpeopsa
L+R: Amin


09. Marende BE No. 691:1 “Hupasahat ma tu Jesus”
♫ Hupasahat ma tu Jesus saluhutna ngolungki
Roha nang pambaenanku saluhutna tingkingki
Hupasahat ma tu Jesus saluhutna diringki
Hupasahat ma tu Jesus saluhutna ngolungki (Jongjong)

10. Manghatindanghon Haporseaon
L: Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:
Ahu porsea di Debata Jahowa, i do Ama, Pargogo na so hatudosan na tumompa langit dohot tano.
Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, AmaNa i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.
Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen!
11. Marende BE NO. 669:1 “Ringgas au Paboahon”
♫ Ringgas au paboahon barita na uli Barita haholongan ni Jesus Tuhanki
Ringgas au paboahon ai na sintong do i mambuat nasa holso soada tudos ni i
Ringgas au paboahon barita na umuli Barita haholongon ni Jesus Tuhanki

12. Jamita : 1 Musa 1: 26 – 31

13. Marende BE No. 569:1 - 2 “O Debata tung longang do rohangku”
<<<<<Papungu Pelean>>>>>
♫ O Debata tung longang do rohangku molo hubereng na tinompaMi
Saluhut bintang, hilap dohot ronggur Manghatindanghon hasangaponMi
Marende au Tuhan mamuji Ho O Debata, sangap do Ho
Marende au Tuhan mamuji Ho O Debata, sangap do Ho

♫ Di ladang di adaran dohot tombak Marende pidong tung mansai sonang
Punsu ni dolok, sunge dohot rura Mamaritahon sangapMi Tuhan
Marende au Tuhan mamuji Ho O Debata, sangap do Ho
Marende au Tuhan mamuji Ho O Debata, sangap do Ho

14. Tangiang Pelean – Ale Amanami - Pasupasu
L: Tapasahat ma peleanta tu adopan ni Debata, martangiang ma hita : Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandak mauliate tu Ho, marhitehite Jesus Kristus Tuhannami. A m e n
J: (Mangendehon ) BE No. 204 : 2
♫ Nasa na nilehonMi Tondi rodi pamatangku
Hosa dohot gogongki Rodi saluhut artangku
Hupasahat i tu Ho n a so unsatonhu do
L: Ale Debatanami, Debata Ama, Anak dohot Tondi Parbadia! Na badia, na badia, na badia do Ho, jala gok hamuliaonMu liat portibi on. Pinuji jala pinasangap ma ho ro di saleleng ni lelengna, ala ni asi ni rohaM naung sahat tu hami dohot tu sude HuriaM. Na marlas ni roha do hami nuaeng, ala naung dipapatar jala dipatandahon Ho tu hami hadirionMu, holong ni rohaM, asi ni rohaM, lambas ni rohaM, hasesaan ni dosa, hangoluan sogot, arta silehononMu sogot ro di uhum sidabuonMu sogot. Na so habilangan do sudena i, ai na so dung niantusan ni jolma, dipatorang Ho do tu hami; na so dung niida ni jolma, dipataridahon Ho do tu hami; na so dung hinasiholan ni portibi on, diboan Ho do di hami; na so tarlehon portibi on dilehon Ho do tu hami. Ala ni i hupasahat hami ma tu Ho dagingnami, tondinami, rohanami ro di saluhut na di hami, asa patauonMu hami tu harajaonMu na di banua ginjang. Ho do manompa hami, umbahen tubu hami tu hasiangan on; sai tompa jala paimbaru ma hami, asa tubu hami paduahalihon, jala gabe partohap di hasiangan na ro sogot, di lambungMi. Na unduk jala serep do rohanami ro tu Ho mangalehon rohanami, sai bahen ma i ingananMu. Sai Ho ma mangula jala margogo di bagasan hami, sai paujung ulaon naung pinungkaM i di hami, naung sinahaphonMu GoarMu tu hami, naung tardidi hami tu bagasan GoarMu na badia i, asa hami di Ho jala Ho di hami. Sai lam tanggali roha na buruk sian hami jala solukhon roha na imbaru tu hami, asa badia parangenami, paboa naung mauliate rohanami tu Ho. Sai pargogoi ma hami, asa huparangehon hami sude na nidokMu tu hami, paboa naung tutu hami angka anakMu jala panean di hangoluan sogot. Sai paian Barita na Uli di hami, asa adong pargogonami, saleleng hubolus hami hasiangan on. Sai patogu haporsesonnami marhite Tondi Parbadia sahat ro di hamatean, asa sahat hami tu Ho, Amanami marhitehite Tuhan Jesus Kristus. Amen.
Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!
R: (mangendehon) Ai Ho do nampuna harajaon dohot hagogoon ro di hasangapon saleleng ni lelengna. A m e n !
L: Dipasupasu jala diramoti Tuhan Debata ma ho (hita) ! Disondangkon Tuhan Debata ma bohiNa tu ho (hita) jula asi ma rohaNa mida ho (hita)! Didompakhon Tuhan Debata ma bohiNa tu ho ( hita) jala dipasaorhon ma dameNa tu tondim (tondinta be). A m e n .
J: (Mangendehon) Amen, Amen, Amen.


Catatan: Bagian terakhir: “PASUPASU” molo Pendeta mamangke hata “ho”, molo Guru Huria, Bibelvrouw, Diakones, Sintua dohot ruas mamangke hata “hita”.

PRAESES-PELAYAN PENUH WAKTU-PARHALADO

HKBP DISTRIK XVII INDONSIA BAGIAN TIMUR

MENGUCAPKAN:

“SELAMAT HARI MINGGU”

“TUHAN YESUS MEMBERKATI