HURIA KRISTEN BATAK PROTESTAN
HKBP DISTRIK XVII INDONESIA BAGIAN TIMUR
TEMA :
“Hasintongan ni Debata na paluahon”
Minggu, 29 Maret 2020
I. Pangaradeon
II. Partangiangan
1. Marende BE. No. 17 : 1 + 3 “Raja na tumimbul”
Raja na tumimbul sigomgomi hami, jalo ma pujiannami.
Denggan ni basaM do pangoluhon hami, atik pe mardosa hami.
Sai apoi, pargogoi hami mangendehon sangapMi o Tuhan.
Sai dipuji langit jadijadianMu saluhut pambahenanMu.
Parsinondang bolon na marpamongguri, Ho o Tuhan do dipuji.
Bulan i, bintang pe, Ho do pinujina dohot sinondangna.
===organ===
(Jongjong)
Dohot do tondingku tungkap di adopan ni habangsaMi o Tuhan.
Nang sude donganhu, nasa na marhosa pujionna do Jahowa.
Sai tongtong, na sintong holan Debatanta do sipujionta.
2. Votum – Introitus – Tangiang (L: Liturgis, R: Ruas)
L:Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on.
R:Amen.
L:Luluhon ma ahu, ale Debata, jala parbadahon badangku dompak bangso na so daulat roha.
R:Sai palua ma ahu sian baoa siulahon sipaotooto dohot hajengkelon.
L:Ai Ho do Debata haroroan ni hagogoonku.
R:Tongos ma hatiuronMu dohot hatigoranMu, angka na manogu ahu.
L:Pataru ahu tu dolok ni habadiaonMu dohot tu ingananMu. Haleluya.
R:(mangendehon) Haleluya…Haleluya…Haleluya…!
Martangiang ma hita :
Ale Tuhan Debata, Amanami na di banua ginjang, Parasiroha na sumurung! Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida.
Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut ala ni pelean na sun denggan, na pinelehonNa i humophop hami. Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen. (hundul ma ruas)
3. Marende BE. No. 194 : 1 – 2 “Aut so asi rohaM”
Aut so asi rohaM, aut so godang basaM, tudia au ?
Alai dibaen basaM dohot asi rohaM tu surgo au.
Mauliate ma di Ho, o Debata ala basaM.
Sibahen dalan i marhite AnakMi tu banuaM.
4. Patik
L:Tangihon hamu ma Patik ni Debata, i ma Patik na Paduahon :
Ndang jadi ganaonmu jala ndang jadi sumanonmu manang aha na di banuaginjang dohot na di banuatonga on ro di na di bagasan aek na di toru ni tano, ianggo tung gabe sisombaon manang sioloan.
Dia do lapatan ni i?
On do : Ingkon dihabiari rohanta Debata jala ingkon holong rohanta di Ibana, asa ndang jadi iba marsomba tu sombaon manang tu ganaganaan, mangido hangoluan sian i, jala ndang jadi oloan begu manang ulpuhan ni hadatuon, jala ndang jadi pos roha di ugasan homitan.
Antong, rap mangido gogo ma hita sian Debata!
R:Ale Tuhan Debata! Sai pargogoi ma hami mangulahon na hombar tu PatikMi. Amen.
5. Marende BE. No. 165 : 1 – 2 “Na basa do rohaM di au”
Na basa do rohaM di au, o Jesus Tuhanhi.
Diihuthon Ho au tu na dao, mambuat rohangki.
(jongjong)
Pardosa na godang do au, badia anggo Ho.
Sai tu na roa do au lao, sai tu na jahat do.
6. Manopoti Dosa
L: Tatopoti ma dosanta !
Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami. Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami. Dibahen i tama do rimasanMu jala uhumanMu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni rohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami na dangol on! Amen.
Tabege ma hata bagabaga taringot tu hasesaan ni dosa :
Songon on do Hata ni Tuhan Jahowa: Nunga pola Hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do Sipalua ho.
Hasangapon ma di Debata na di ginjang!
R: Amen. (hundul ma ruas)
7. Marende BE. No. 428 : 1 “Ho na loja ho na sorat”
Ho na loja, ho na sorat, pos roham di Debatam.
Di na hansit, di na borat, dipapita do roham.
Unang ganggu rohamuna dipandok ni Debatam.
PasautonNa bagabaga, pos roham di Debatam.
8. Epistel : Sepanya 2 : 1 – 3
L:Tabege ma Hata ni Debata turpuk ni ari Minggu on, i ma na tarsurat di Sepanya 2 : 1 – 3. Tajaha ma marsingkatsorin, songon on ma Hata ni Debata : Tungki ma hamu jala mardangoldangol; ho ale bangso na so umboto na maila!
R:Tagan so songgop dope uhum i, songon hurangkam do laho salpu ari, tagan so songgop dope tu hamu parpiar ni rimas ni Jahowa, tagan so songgop dope tu hamu ari pangarimasan ni Jahowa.
L:Lului ma Jahowa, sude hamu ale angka na unduk roha di tano on, hamu angka na mangaradoti uhumNa; lului hamu ma hatigoran, lului haserepon, anggiat tung diondingi hamu di ari pangarimasan ni Jahowa.
I do sahatna. Martua do angka na tumangihon hata ni Debata jala na umpeopsa.
L+R: Amen.
9. Marende BE. No. 747 : 1 – 2 “Sai hunangkohi dolok i”
Sai hunangkohi dalan i, dalan na marmulia i.
On do tongtong tangianghi, Tuhan patongtong langkangki.
Sai togutogu au Tuhan, baen lam solhot tu lambungMi.
Tu ingananMu na tongam, sai lam patongtong langkangki.
(jongjong)
Ndang olo au di na holom hot di ganggu ni roha i.
Sai tong masihol rohangkon tu inganan na timbo i.
Sai togutogu au Tuhan, baen lam solhot tu lambungMi.
Tu ingananMu na tongam, sai lam patongtong langkangki.
10. Manghatindanghon Haporseaon
L:Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok :
R:Ahu porsea di Debata Jahowa, i do Ama, Pargogo na so hatudosan na tumompa langit dohot tano.
Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, AmaNa i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.
Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.
(hundul ma ruas)
11. Marende BE. No. 417 : 1 + 3 “Rade situtu haluaon”
Rade situtu haluaon na naeng tangkuponmu antong.
Rade nang di ho hatuaon, sihalashononmu tongtong.
Bernit do ditaon Tuhanmu pasaehon dosam sasude.
Tung unang paujat Ibana, sai jangkon panghophopNa i.
PanghophopNa i parangehon, pasangap Tuhanmu antong.
Ibana buas mangalehon tu ho hasonangan tongtong.
Sandok sian holso malua, nang sian biarmu sude.
Sonang nama ho na martua, manghirim tongtong surgo i.
12. Jamita : 2 Petrus 1 : 1 – 9
13. Marende BE. No. 763 : 1 – 2 “Molo Jesus donganmi” + Papungu Pelean
Molo Jesus donganmi las roham, Jesus i pangurupim las roham.
Hot haporseaonmi dohot pos ni rohami, mardonganhon Jesus i las roham.
Las roham, las roham, mardonganhon Jesus i las roham;
marsinondang ma di ho, bintang panghirimon i,
mardonganhon Jesus i las roham.
Molo Jesus donganmi las roham, jagaonNa tondimi las roham.
Tiruonmu ma tongtong dame nang holongNa i,
saleleng di ngolumi las roham.
Las roham, las roham, mardonganhon Jesus i las roham;
marsinondang ma di ho, bintang panghirimon i,
mardonganhon Jesus i las roham.
14. Tangiang Pelean – Ale Amanami - Pasupasu
L:Tatangianghon ma peleanta :
Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on.
Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.
R:(mangendehon) Nasa na nilehonMi, tondi ro di pamatangku,
hosa dohot gogongki, ro di saluhut artangku,
hupasahat i tu Ho, na so unsatonku do.
L:Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!
R:(mangendehon) Ai Ho do nampuna harajaon dohot hagogoon ro di hasangapon saleleng ni leleng. Amen !
L:Dipasupasu jala diramoti Tuhan Debata ma ho (hita)!
Disondangkon Tuhan Debata ma bohiNa tu ho (hita) jala asi ma rohaNa mida ho (hita)!
Didompakhon Tuhan Debata ma bohiNa tu ho (hita) jala dipasaorhon ma dameNa tu tondim (tondinta). Amen.
L+R: (Mangendehon) Amen…Amen…Amen!
Catatan :
1. Tertib acara on boi do dipahombar tu haringkotanna.
2. Bagian terakhir : Pasupasu.
Molo Pandita mamangke hata “Ho”, molo Guru Huria, Bibelbvrouw, Diakones, Sintua dohot Ruas mamangke hata “Hita”.
PRAESES – PANGULA NA GOK TINGKI – PARHALADO
HKBP DISTRIK XVII INDONESIA BAGIAN TIMUR
PASAHATHON :
SELAMAT ARI MINGGU
DIPASUPASU DEBATA MA HITA SALUHUTNA !
No comments:
Post a Comment