Minggu Palmarum, 5 April 2020

PAR TORDING NI ACARA

MINGGU palmarum

PAR MINGGU ON DI BAGAS KELUARGA

H uria Kristen B atak P rotestan

DISTRIK XXI BANTEN

TOPIK:

IDA MA, NA RO DO RAJAM !

MINGGU, 05 APRIL 2020

PAR TORDING NI ACARA

PAR MINGGU ON DI BAGAS KELUARGA

MINGGU PALMARUM

MINGGU, 05 APRIL 2020

I. ACARA PARMINGGUON
01. Joujou Marsomba Tu Debata: (U = Uluan; R = Ruas; S: Sude)
U: Selamat ari Minggu ma di Hita!
R: Selamat ari Minggu.
U: Hamu dongan sahaporseaon! Digoari do Minggu sadari on ima Minggu Palmarum, marningot di tingki bongot Tuhan Jesus tu huta Jerusalem. Deba sian natorop i pahembanghon ulos nasida tu dalan i, na deba nari manallihi ranting ni angka hau jadi dipanserakhon tusi.
R: Alai sude do natorop i, angka na di joloNa nang na mangihut sian pudi pe, mangolopolophon: “Hosianna di Anak ni Raja Daud. Pinasupasu ma na ro marhitehite goar ni Tuhan i. Hosianna ma di ginjang.”
U: Jangkon hamuma Jesus i bongot tu bagasan rohamuna, rata ma nang haporseoanmuna songon bulung maremare. Jou hamu ma goarNa ganup ari. Antong taparade ma dirinta, tapuji ma Tuhanta, marende ma hita!

02. Mangendehon BE No. 45 : 1, 2 “ Hosianna Anak Ni ”
1. Hosianna Anak ni, Raja David ro tu hita
Baen ture dalanna i, asa bongot tu rohanta.

Baen ma gabagaba i, di Tuhanta na ro i.
2. Hosianna ro ma Ho, tu bagasan rohanami;
Na manomunomu Ho, ale Jesus Tuhannami.
Las do rohanami i, molo bongot Ho tusi.

03. Votum - Introitus (Responsoria)
U: Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on, amen. Asi ma rohaM di ahu, ale Jahowa, ai targogot do au, maras do rohangku dohot dagingku. Alai anggo au, tu Ho do ahu marhaporusan, ale Jahowa, ningku do: Ho do Debatangku.
R: Marguru tu tanganMu do angka parsorionki, sai palua ma ahu sian tangan ni angka musungku dohot sian angka namangalotongi ahu.
U: Ale Jahowa, sai unang paurak ahu, ai Ho do na hujou, sai palua ma ahu marhite hatigoranMu. Haleluya!
R: Mangendehon: Haleluya, Haleluya, Haleluya.
U: Martangiang ma hita: Ale Tuhan Debata Parasiroha nasumurung! Asi ma rohaM di hami halak na gale on. Di ida Ho do nuaeng musunami di portibi on, songoni nang di negaranami on, ima wabah virus corona na mambahen hami mabiar di ngolunami siganup ari. Sai ramoti ma hami saluhutna maralohon i jala padao ma sian hami mara ala ni parsahiton i marhite panaonon ni Anak haholongan ni rohaM, Tuhan Jesus Kristus. Amen.
04. Mangendehon BE No. 210 : 1 “ O Tuhan Na Marasi Roha”
1. O Tuhan na marasi roha, na so tardodo jolma i.
Torop do halak sipardosa, na rap mamuji goarMi.
Dibaen basaM na godang i, marhitehite Jesus i.
05. Patik :
U: Hamu na hinaholongan dibagasan goar ni Tuhanta Jesus Kristus. Ndang tagamon so mabiar hita ala ni na masa di partingkian sisaonari on. Saluhutna do hita manjamothon diri asa unang songgop tu hita wabah virus corona. Tahaporseai ma hata ni Tuhanta na gabe patik di Minggu ta sadari on, ima na tarsurat di 2 Timotius 1:7 “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton”. Ido sahat na. Antong rap mangido gogo ma hita tu adopan ni Debata.
S: Ale Tuhan Debata! Sai pargogoi ma hami mangulahon na hombar tu PatikMi. Amen.

06. Mangendehon BE No. 182 : 1-2 “ Tu joloM O Debatangku ”
1. Tu joloM o Debatangku sai use do rohangkon
Sai pasiat tangiangku dohot iluilungkon
2. Husolsoli do rohangku na gok dosa i tongtong
Ai godang ariaringku na hubahen ambolong
07. Renungan Situasional / Hasesaan ni dosa
U: Ale Tuhan Debata, na badia jala na bonar. Parasi jala Partalup ni roha. Sai marpangulahi ma rohaM mida hami. Dibahen i sai sesa ma sude dosanami! Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen i pasonang jala apuli ma hami, asa manongtong haporseaonnami mangihuthon Ho, molo tung pe maheu gogonami, bontar nang simanjujungnami, homur parnidaannami nang hallang dilanami, alai lam tu imbaruna ma haporseaonnami.
R: Sesa ma saluhut dosa nang pangalaosionnami maradophon Ho nang dongannami jolma. Sai ramoti ma hami saluhutna!
U: Ale Tuhan Debata, Ho do mula ni ngolu di saluhut jolma. Jala Ho do haporusannami. Molo tung mabiar pe hami, hitir simanjojaknami ala ni na masa diparngoluon nami di tingki on, sai patogu ma haporseaonnami!

~~~martangiang mangido hasesaan ni dosa~~~

U: Baga-baga ni Debata taringot tu hasesaani dosa ta : Songon on do Hata ni Jahowa : Unang ho mabiar, ai Ahu do siluluhon ho; nunga pola hujou goarmu, Ahu nampuna ho. Hasangapon ma di Debata na di ginjang.
R: Amen.
08. Mangendehon BE No. 211 : 2. “ Tuhan Jesus Siparmahan”
2. Jumpa masa sorimago, tung pangapul Ho gogo
Ia bogasMi huida, sai ihuthononku Ho
Sai ihuthononku Ho, sai ihuthononku Ho
Ia bogasMi huida sai ihuthononku Ho.
09. Epistel:
U: Epistel dibagasan minggunta, i ma na tarsurat di Jesaya 52:7-12. Lehetna i di atas ni angka dolok angka pat ni parbarita na uli, na patubegehon hadameon, na mamaritahon barita na uli, na patubegehon hatuaon, na mandok tu Sion: Debatam do bangkit Raja.
R: Soara ni jolma parhalmu, angka dipangiar be soarana rap marolopolop, ai adop bohi be diida nasida, molo mulak Jahowa tu Sion.
U: Pangiar ma soaramuna rap marolopolop ma hamu, ale angka pasipasi ni Jerusalem, ai nunga marpangulahi roha ni Jahowa mida bangsona, nunga dipalua Jerusalem.
R: Nunga pola dipatoltol Jahowa tanganna na badia i di adopan ni saluhut bangso parbegu, jadi saluhut ujung ni tano on marnida hatuaon ni Debatanta.
U: Ruar, ruar, borhat ma hamu sian i, unang jama hamu na ramun! Ruar ma hamu sian tongatonganasida! Manguras ma hamu, ale angka na mangusung ulaula ni Jahowa.
R: Ai ndang pola humalaput hamu laho ruar, manang marlojong songon halak na maporus, ai Jahowa do manguluhon hamu, jala Debata ni Israel mangiringiring hamu sian pudi.
U: Olat ni ido sahatna. Ima sahatna: Martua do angka na tumangihon hata ni Debata jala na umpeopsa.
R: Amen.
10. Mangendehon BE No. 213 : 1 . “Dung Sonang Rohangku”
1. Dung sonang rohangku dibaen Jesus i, porsuk pe hutaon di son
Na pos do rohangku di Tuhanta i, dipasonang tongtong rohangkon
Sonang do, sonang do, dipasonang tongtong rohangkon.
11. Manghatindanghon Haporseaon:
U: Tahatindanghon ma haporseaonta i, songon na hinatadinghon ni donganta sahaporseaon di sandok portibi on. Rap ma hita mandok:
S: Ahu porsea ….. du. Amen !
12. Tangiang Pangondianon
13. Mangendehon BE No. 508 : 2 “Sai Patogu”
2. Sai patogu rohangki, ale Jesus Tuhanki
Golom dohot tanganMi au dipardalananki
Molo loja au dison pargogoi ma au tongtong
Dok tu au hutogu pe ho tu surgo i muse
14. Jamita : Johanes 12:12-19.
15. Marende BE. No. 223 : 1-2. “Husomba Ho Tuhan” (Pelean)
1. Husomba Ho Tuhan, tangihon au! SangkapMu ma tongtong pasauttu au
Lam ganda baenonMi, holong ni rohangki. Sai lam gandai holong tu Ho
2. Uju na lilu au, dao sian Ho, sai dilului Ho au, laos jumpang do.
Ala ni holong do rohangkinon di Ho. Sai lam gandai holong tu Ho!

16. Rap Mandok : Tangiang Ale Amanami.
Mangendehon : Amin, Amin, Amin!